2025-nji ýylyň 11-nji aprelinde geçirilen Hökümet mejlisinde Ministrler Kabinetiniň ýanyndaky Ulag we aragatnaşyk agentliginiň Baş direktory M.Çakyýew raýat awiasiýasy üçin ýokary derejeli hünärmenleri taýýarlamak boýunça halkara guramalar bilen bilelikde alnyp barylýan işler barada hasabat berdi. Hasabatda bellenilişi ýaly, “Türkmenhowaýollary” agentligi halkara raýat awiasiýasy guramasynyň (ICAO) ýörite maksatnamasynyň çäklerinde degişli çäreleri görýär. Bu maksatnama dünýäde awiasiýa işgärleriniň taýýarlygynyň hilini we netijeliligini ýokarlandyrmaga, okuw merkezleriniň arasynda hyzmatdaşlygy ösdürmäge we tejribe alyşmaga gönükdirilendir. Bu çäreler ýurdumyzda howa ulaglary üçin hünärmenleriň taýýarlanylmagyna hem-de bu ugurda halkara hyzmatdaşlygyň giňeldilmegine ýardam eder. Şunuň bilen baglylykda, döwlet Baştutanynyň garamagyna degişli teklip hödürlenildi. Hasabaty diňläp, Prezident Serdar Berdimuhamedow raýat awiasiýasy üçin halkara derejesindäki hünärmenleri taýýarlamak maksady bilen, ýöriteleşdirilen abraýly guramalar bilen ýola goýlan gatnaşyklaryň mundan beýläk-de pugtalandyrylmagynyň ähmiýetini nygtady. Döwlet Baştutanymyz “Türkmenhowaýollary” agentliginiň howa ulaglary işgärlerini taýýarlamak boýunça mekdebiniň işini kämilleşdirmek baradaky teklibi makullap, Agentligiň ýolbaşçysyna degişli işleri geçirmegi tabşyrdy. Çeşme: Türkmenistanyň Döwlet habarlar agentligi